| SAN GAUDENZIO
Diseva un deto: Mile e no più mile – ma isteso el vecio mondo andava avanti; propio in quel tenpo el vescovo Martin de Ossaro, cun tuti i abitanti , ga ospitado la nave veneziana cu‘l Dose Piero Orseolo. Canpane sonava a tuta corda e risbonbava l’ aria sveiando el mar e la campagna e fina in altra parte l’arivava. Anche de là se alzava una montagna: de la nostra, che conosemo, quela vignaria squasi star una gemela. Tuta la storia de la nostra tera sto monte qua, se pol capir, ga visto oservando de alto i canbiamenti che jera stadi, prima e dopo Cristo. Cusì‘l vedeva alora i Osarini soto l’inperator dei Bizantini. Sto inperator, che no gaveva tenpo de aministrar, gaveva el bruto vizio de nominar, al posto suo, un factotum cu‘l titolo inportante de Patrizio. Lu disbroiava tute le madase e sovratuto quela dele tase. Ma tornemo ala visita del Dose vignudo par conbatar i pirati. Co‘l xe andà via, passadi un fià de ani, xe diventà Patrizio, dei croati el re, de nome Piero Cressimiro un baruffante cu‘l muso de sbiro. El vescovo Martin oramai morto, al posto suo xe vescovo Gaudenzio, co vien in cesa, proprio el dì de Pasqua, sbatendo i tachi in quel santo silenzio sto Cressimiro, armado fin ai denti, come che usa far i prepotenti. Gaudenzio lo scomunica de colpo. Ma la sua crica no se dà de pati e tuti contro el vescovo i se mete e via i lo scaza. Alora zerti frati lo tramaca in Italia fin che, insoma l’ariva in zenocion dal Papa, a Roma. E de là el resta un per de ani, quando ghe dise el Papa che‘l deve tornar; ubidendo lu parte e justo el tenpo el ga fina in Ancona de arivar, ma de febre ghe ciapa un tal tormento che‘l vien ricoverado in un convento. Guarido, el vive par do ani ancora dispensando fra quela jente amor, finchè, rivada la sua ora, el more beato nela pase del Signor. Adesso vien el belo de stà storia che finirà, come ogni salmo, in gloria. In do maniere sona le canpane e tuta la question se fa spinosa, chi la conta in un modo e chi in un altro chi canta in poesia, chi parla in prosa. Scoltemo tute do par no sbaliar e ognidun pensi cos che‘l vol pensar. Un zentiner de ani dopo morto, el vescovo Gaudenzio, oramai Santo, el ga fato un miraculo famoso e i Ossarini ghe tien propio tanto. La bara tuto el mar ga traversado e po in secada la se gà ingradado. Un picolo pastor, par là passando el gà visto sta cassa e spaurido de corsa el ga ciamado da la jente. Su la riva del mar se ga riunido i fedeli cun tanta devozion portado i ga la bara in procission; I la ga meso in una capeleta vizin la Catedral, cun grande onor, e de quel jorno questo San Gaudenzio de Ossaro el xe stado el Protetor. Questa xe la canpana in poesia par che che vol sentir. E Così Sia ! Altri la conta in modo difarente, saria quei che ga i pie posadi in tera; i dise che la cassa ga robado zerti ossarini durante una guera dei veneziani, là atorno Ancona, e anche sta version, tignimo bona De fati, una rosa resta rosa E anche si ghe metemo un altro nome, dise el poeta. El nostro San Gaudenzio el resta senpre un grande Santo, eccome ! Ognidun crede el suo, nissun se lagna, ma ‘l vero lo sa solo la montagna. Ma penne più famose, tante volte, ga cantado San Marco e le sue Glorie. Mì se cuntentarò chersinamente de far el mio mestier de cantastorie, disendo quele de l’isola mia un fià vere e, un fiatin de fantasia. Aldo Policek |