Vrana

         EL LAGO DE VRANA



Jera una volta in questo nostro scoio ,
deboto in mesaria , una vale larga
e longa , piena de una bona tera
tanto che la canpagna jera carga
de ogni sorte de fruti , in quantità,
par fortuna de quela jente là .

De fianco de la  vale , in un castelo ,
viveva do sorelle , ormai in età ,
do marantighe  piene de oro e bezi ,
parone de una granda facoltà .
Cussì tegnose che la servitù
da lore no voleva servir più .

Un jorno  su le porte se presenta
un povaro strazado , suto in viso ,
suplicandole  , par amor de Dio
e dei Santi che sta in Paradiso:
-Me basta un fià de pan e un paion
par dormir qua , stanote , in un canton .

No  ‘l ga gnanche finì de parlar
che le taca zigarghe de rimando :
Fora de qua , vu bruto vagabondo ,
omo vizioso , magna pan de bando;
cossa credè che ‘l pan no costa gnente ,
andè via de qua ,ladro spuzulente !

L’ omo le ga guardado fisso in viso
spetando una parola de pietà
ma lore  gnente , dure come un sasso,
fora de casa le lo ga scazà
lassando là inpiantado sto cristian
meso morto de fame , come un can .-

In un bàtar de ocio se ga visto
quel povaro strazzado, magro e bruto ,
diventar un signor alto , elegante ,
e ‘l ghe ga deto : - Me spetavo tuto
ma no che me lassè crepar de fame ;
par questo dovarè ciamarse grame .

Mi son el fio  de quela madre tera
che ve ga dado tante bone entrade
ma par la vostra granda cativeria
ve digo mi  ,  sarè castigade .
Deta sta roba, l’ omo xe sparido
e tuto atorno el ciel se ga scurido ;
dopo el ga averto le sue catarate

e se ga sprofondado madre tera
tirando drio el castelo e le sorele
e tuto cos che nela vale jera  .
Cussì se ga formà el lago de Vrana;
àla  fioi , bona note , andè far nana .
                                          Aldo Policek
Leggenda popolare
Chiesa di Vrana  (Vrana's church)
-Volarich di Vrana-
Da sn. Anita, la loro mamma e Fides
Satellite's view of Vrana